Хан-Уул дүүргийн нэгдсэн эмнэлэг

Монгол улсад нийт осол гэмтлийн 86.6 хувийг санамсаргүй осол гэмтэл эзэлдэг. Сүүлийн 5 жилд осол гэмтлийн  гол  шалтгааны  2-рт  0-4 насны хүүхдийн  түлэгдэлт, 5-19 насанд зам тээврийн осол шалтгаанууд тэргүүлж байна. Нийт гэмтэгсдийн 31.2%  /26615/ нь орон гэртээ осолд өртөж эмнэлгийн тусламж үйлчилгээ авсан бол сүүлийн 5 жилд нас барсан тохиолдлын 34.8% нь буюу 3 хүн тутмын 1 нь гэр орон, ахуйн нөхцөлд осолд өртөж нас баржээ. Иймээс  осол гэмтлээс бага насны хүүхдээ урьдчилан сэргийлэхийн тулд эцэг эхчүүд асран хамгаалалгч нарт дараах зөвлөмжийг зөвлөж байна.

• Хүүхдээ усанд оруулахдаа халуун хүйтнийг шалгаж байх, хүүхдээ хооллох үедээ зэрэгцэж хоолоо идэхгүй байх, хийн плетка, гагнуур, халуун тогоо, ус буцалгагч, халуун хоол, цайтай сав, суулгыг хүүхдэээс хол байлгах
• Гэртээ эд зүйлээ эмх цэгцтэй байлгаж хэвших, шатамхай бодис, хийн түлш, цууны хүчил, ялааны хор, угаалгын шингэн, зай зэргийг хүүхдийн гар хүрэхгүй газарт тод тэмдэгтэй газар байрлуулах
• Ил задгай, шалбарч гэмтсэн цахилгааны эх зүүсвэрийг  мэргэжлийн хүний зөвлөгөөгөөр цаг алдалгүй цэгцэлж тог, цахилгаан хэрэгслийн аюулгүй байдлыг тогтмол хангах
• Гэр бүлийнхнийгээ осол гэмтлийн үед авах анхны тусламжийн мэдлэгтэй болгох

Анхны тусламжийг хэрхэн үзүүлэх вэ?

Хүүхдээ түлэгдэх үед эцэг эхчүүдийн 78.1 хувь нь эмнэлэгт очихгүйгээр гэртээ  барааны саван, хоромхон тос, амьтны тос, элсэн чихэр  зэргийг түрхэснээс  шархны эдгэрэлт удаашрах, шарх гүнзгийрэх, хордлогод оруулах, өвдөлт зовиур нэмэгдэж өвчин хүндрүүлэх шалтгаан  болно. Иймээс  юуны өмнө түлэгдсэн хэсгийг 10-15 минут хүйтэн урсгал усанд хөргөж, өвчин намдаах эм өгнө. Цэврүүг хагалж болохгүй. Түлэнхийн талбай нь 5 алга нийлүүлсэн хэмжээнээс их, цавь, хамар, ам, толгой, амьсгалын зам, хоёр гар, хоёр хөл түлэгдсэн үед түлэгдэлтийн зэргээс үл хамаараад эмчид яаралтай хандах шаардлагатай

ХҮҮХДИЙН ӨСӨН  ТОРНИЖ БУЙ ОРЧИН АЮУЛТАЙ, ХОР ХӨНӨӨЛ УЧРУУЛДАГ БАЙХ ЁСГҮЙ. ҮҮНИЙГ ЭЦЭГ ЭХ БОЛСОН ТА БИД Л ӨӨРЧИЛЖ ЧАДНА.